আন্ধাৰে তোমাক গ্ৰাস কৰোতে
মই জোনাকী পৰুৱা হৈ
পোহৰাই পেলালো
তোমাৰ স্বপ্নৰ কাৰেংঘৰ !!
----------------------------
* সংগম *
নিশাবোৰ গভীৰ হয়,
উষ্ণ হয়,
উশাহ বোৰ
চুটি হয়..
দুটি দেহা
এটি হয়..
সৃষ্টি হয়
অন্য এটি সূৰ্যৰ...
এইদৰেই,
চলি থাকে পৃথিৱী...!!
----------------------------
** জীৱন **
সময় নদীৰ প্ৰবাল সোঁতেৰে
চলাই যাওঁ মই নাও খনি
যাৰ নাম ''জীৱন'' !
নাৱৰ ব'ঠাত পৰি ৰয়
সুখ-দুখ, ঘাত-প্ৰতিঘাত....!!
----------------------------
* ''আশীৰ্বাদ''ত
অভিশাপ ! *
ভ্ৰাম্যমাণৰ ইতিহাসত
এটি ক'লা দিন !
অনাকাংক্ষিতভাৱে
নামি আহিল অমানিশা !
অৰ্থ-গ্লেমাৰৰ পিছত দৌৰা
এক প্ৰেমিক-যুগলে
কলংকিত কৰিলে
''আশীৰ্বাদ''ৰ সুনাম !
আজি অসমত ''শিল্পী''ৰ
বাৰুকৈয়ে ঘটিছে অভাৱ !
এইদৰে থাকিলে
ভ্ৰাম্যমাণৰ গতি
ৰুদ্ধ হ'বলৈ কিমান পৰ ???
(23/03/13)
----------------------------
** মহানগৰী আজি এজাক বৰষুণৰ অপেক্ষাত... **
ধূলি আৰু পছোৱাৰ
সংগমত ক্লান্ত
মহানগৰীবাসী !
সকলো অপেক্ষাৰত আজি
বসন্তৰ আগমণিলৈ...
কংক্ৰিটৰ মহানগৰী
আজি সম্পূৰ্ণ শুষ্ক-ৰুক্ষ !
ধূলিৰে ধূসৰিত চৌদিশ,
পিষ্ট জন-জীৱন...
(চাব, আপোনাৰ অসুখো হৈ যাব পাৰে !)
জন অৰণ্যত আজি
মানৱতাৰ অপমৃত্যু
মানুহৰ মনবোৰ
সলনি হৈছে-
ঠিক বতৰটোৰ দৰেই !
পাপ-ব্যভিচাৰেৰে পূৰ্ণ
আপোনাৰ-মোৰ
প্ৰিয় মহানগৰী খন...
সেয়ে, সঁচাকৈয়ে আজি
প্ৰয়োজন হৈছে
এজাক বৰষুণৰ,
যিয়ে ধুই নিকা
কৰি দিব পাৰে
সেই সকলৰ
কলুষিত মনবোৰো....!!
----------------------------
** নগ্নতা **
সম্পৰ্কত নগ্নতা
সাহিত্যত নগ্নতা
কলা-সংস্কৃতিত নগ্নতা
চিনেমাত নগ্নতা
ক্ষমতাত নগ্নতা
ৰাজনীতিত নগ্নতা
শিক্ষা-ব্যৱস্থাত নগ্নতা
খেল জগতত নগ্নতা
প্ৰেমত নগ্নতা
পিন্ধনত নগ্নতা
বেডৰুমত নগ্নতা
বাথৰুমত নগ্নতা
চৰিত্ৰত নগ্নতা
আতিথ্যত নগ্নতা...
নগ্নতা মনত,
নগ্নতা হৃদয়ত..
আজি সকলোতে মাথো
নগ্নতা নগ্নতা কেৱল নগ্নতা....!!
----------------------------
** কবিতা **
কবিতা পঢ়ি পাহৰিব পাৰি
দুখ-যান্ত্ৰণা আনকি গ্লানিও,
কবিতা জীৱনৰ
অন্য এক মাদকতা..
কবিতাৰেই আপুনি লিখিব পাৰে
প্ৰত্যাশাৰ দিনলিপি,
আঁকিব পাৰে জীৱনৰ জলছবি,
বিচাৰি পাব পাৰে
হেঁপাহৰ সোৱনশিৰি...
অথবা,
প্ৰেমানুভৱৰ অতুলনীয় নিৰ্যাস...!
(বিশেষ সতৰ্কীকৰণ :
এবাৰ 'কবিতা'ৰ প্ৰেমত পৰাৰ পিছত
আপুনিও হৈ পৰিব পাৰে
তেওঁৰ এজন দূৰ্দান্ত প্ৰেমিক !)
----------------------------
ණ প্ৰিন্স অবিনাশ
